السيرك

العالم سيرك كبير عِبرى

جمهوره جميع الكون

ولأن جدودك كانوا قرود

اعمل ميمون

قوم يالّه اتمختر واتنطط

واتحزم بالشرق الأوسط

وارقص ياشارون

خليك سفاح زى عوايدك

اوعاك تسمع مرة " رويدك "

سلفنا سلام كله استسلام

واقبض من أرواحنا فوايدك

والعب ياشارون

جات ع الطبطاب ياسلام سلّم

أوراقك لشارون واستسلم

لملم يا شارون كل الأوراق

من هذا الحين ورجوعاً لمعاهدة " كارتر"

حط الأوراق فوق بعضيها

فك حزامك وعليها "طرطر"

وإن قال لك غزة وأريحا

شد لها سيفون تخفى الريحة..

واوعى تفكر

والعب يا شارون

ولّع كبريتك قوم واجرى

د الأرض بتتكلم عبرى

احرق فـ القدس الشرقية

واحرق فـ القدس الغربية

وادخل بجنودك ع الأقصى

ولّع فـ حصيره وجدرانه

ولا سيدنأ " نيرون"

سكت برصاصك من رفضوا

أو قاموا هناك ولا انتفضوا

حتى الماشين ساكتين أمنين

خلّص واضربهم بالمرة

وإن شالله يموت مليون " درة "

وإن قالوا سلام كرر لعبك

وإن قالوا حروب سلّم لى على الأرض الحرة

وإن قالوا يابوش

قوم حلّق حوش

غنّى لهم نهاوند وسيكا

راح يعمل إيه المخفى سى بوش

دا حيالله رئيس أمريكا

أراجوز فـ إيدكم لما تقوله : اتكلم

يبقى قوام بربنط

ولما تقوله يهسّ

ينزل فوق سهم الله

عبد المأمور والأمر بتاعه فـ إيد مولاه

لو سيده يغنى يقول : الله

على صوت مولانا وصيته

وإن رفض العالم كله غُناه

يستخدم حق الفيتو

وإن شالله يغور الكون

وارقص يا شارون

محمى فـ الرايحة وف الجاية

قوم دوس ع الدول العربية

واوعى تخلّى

( يا ورد ع الصحبة يا للى )

وإن سلام زى العادة

شربهم فـ القهوة السادة

وسلامهم عند أم الّلَلِّى

اوعى تظن كلامى هزار

دا أنا فرحان بيك قوى يا شارون

طوح فينا يا شرشر فوق

وكمان فوق

وارمى الناس من فوق الفوق

لما تكون النزلة قوية

لازم كل الناس دى تفوق

بس لعلمك لازم سيركك يوم ينفض

طول ما إيدين ال اولاد مليانة بطوب الأرض

بكرة هتجرى

وورا الصخر تروح متخبّى

بس ساعتها

راح يتنصب السيرك العربى