الجاز اكرامى قورة

ياوابور الجاز

لمحوك تايه بين الأسباب

قالوا : دى فرصة وعملوك عكاز

اتسندوا عليه قبل مايقعوا

من فوق الكرسى الهزاز

...

يا وابور الجاز

يامحنى ديل العصفورة بالدم النازل على القضبان

ليه كل البنى أدمين إنسان ؟

مع إن فيه ناس سلمهم درجاته ضرايب

والعتبة عليها السجان

والضحكة من الغلا والكوا ماتت شاردة

مع إن السادة ( إخوانا البعدا )

ضحكتهم بنسد تمنها

والسلم نايلو فـ نايلو _ اللهم احفظهم _

والعتبة جزاز

ياوابور الجاز

مين الغلطان ؟

الشخص اللى يدوبك بيلقى تمن اللقمة

ولاّ العايش فـ تبات ونبات

ولاّ احنا صحيح زى ما قالوا

ما بنعرفشى نركب قطارات ؟

وهأقولك إيه ؟

ما الغلطة الأولى بتعدى

والثانية كمان

لكن التالتة دايماً تابتة

وهتعمل إيه لمواطن م الدرجة التالتة

الفقر رماه على كرسى خشب

أو واقف مزنوق بين القاعدين

فى الدرجة المنوحوسة التالتة

وف لحظة وابور الجاز ولّع فيها واتنيل مات

وسبع مجاميع فـ العربيات

ما التعلب فات

وف ديله سحب شلة أموات

وشالوا لنا ( غفير )

وجابولنا ( غفير )

ما هو قطر وأيامنا محطة وْ ...

حطة يا بطة .. يا دقن القطة

جالنا أونطة .. وراح فـ الغلطة

وبكرة نجيبه المجلس نعمله استجواب

وادى دقنى أهه

لو نعرف مين الكداب

والله يرحم عبد الوهّاب

: يا وابور قولى رايح على فين ؟

ما كتبنا العَقد

للبس العُقد

لمدة عِقد وفات عقدين

واهو يوم فى السما

واتنين فـ الأرض

وربك يعلم رايحين فين

يا وابور قولي